Mga terorista, mga magnanakaw
may mga tulisang kaaway ng bayan;
Bakit ba ganito sa maraming lugar
ngayong hangad natin ay kapayapaan?
Ang katahimikan ay waring mailap
ito’y laging wala kapag hinahanap;
Ang katulad nito’y diwatang mailap
habang sinusuyo’y parang nasa ulap!
Kaya papaanong itong ating bansa
magiging tahimik tayo’y sasagana?
Ang kapayapaan ay palaging wala
dahil sa narito ay maraming wala?
Dahil sa maraming dukha at mahirap
ang katahimikan sa ati’y mailap
Kung sa bansang ito’y walang nagsasalat
ang payapang buhay sasaating lahat!
Kahi’t anong gawin ng ating gobyerno
sa loob ng bansa lagi nang magulo;
Itong mga dukha walang sinasanto
kundi ang hangaring guminhawa ito!
Ang katwiran nila sila’y inaapi
kaya sa mayaman ay naghihiganti;
Hindi nila pansin gawaing mabuti
sa hangad makuha ang gintong marami!
Sa nasang magkamit ng maraming pera
ang buong lipunan inaaway nila;
Buhay na tahimik hindi ninanasa
mabuhay mamatay ay balewala na!