Ngayong Bagong Taon – sana naman sana
Wala nang trahedyang maganap sa bansa;
Wala na ang lindol, ang bagyo at digma
Saka si Misuari nawa’y sumuko na!
Ngayong Bagong Taon tayong mga Pinoy
Wala nang mangyaring sakuna sa ngayon;
Bawa’t mamamayan sa lunsod at nayon
Maraming pagkain walang magugutom!
Ngayong Bagong Taon ang mga sasakyan
Sana’y makaiwas sa mga banggaan;
Mga pasahero habang nakasakay
Walang mag-iisip mangholdap, pumatay!
Ngayong Bagong Taon ang riding-in-tandem
Sa sasakyang motor banal ang mithiin;
Wala silang nais ang tao’y patayin
Pagka’t kapwa tao ay dapat mahalin!
Ngayong Bagong Taon itong mga tsuper
Matapat na tao bilang mga drayber;
Sa pagmamaneho sila’y hindi lasing
At wala ring hangad magbiyaheng matulin!
Ngayong Bagong Taon mga manggagawa
Ay huwag mag-isip ng gawang masama;
Kung sila’y matapat sa nakuhang gawa –
Pamilya’y lulusog bansa’y masagana!
Ngayong Bagong Taon taong mayayaman
Tulungang magbangon nasa kahirapan;
Mayaman at dukha kung magtutulungan
Itong ating bansa’y maligayang bayan!