Mahigpit at modernong border security, isinusulong

Sa pag-aresto sa 244 dayuhan

MANILA, Philippines — Ipinakita ng pagkakaaresto sa 244 dayuhan sa dalawang anti-POGO operations sa Zamboanga Sibugay ang pangangailangan para sa mas mahigpit at modernong border security upang maagap na matukoy ang mga posibleng banta at ilegal na aktibidad sa bansa.

Isinagawa ng Bureau of Immigration (BI) ang operasyon noong Oktubre 2 sa Barangay Kimos, Siay at Barangay Tandiong Muslim, Alicia, kung saan 113 dayuhan ang inaresto sa Siay at 131 sa Alicia. Karamihan sa mga ito ay Chinese nationals na iniimbestigahan sa umano’y paglabag sa immigration laws at ilegal na POGO-related activities.

Nakumpiska rin ang 78 computer monitors, nasa 3,000 cellphone, mga laptop, SIM cards at iba pang kagamitang pinaniniwalaang ginamit sa online scams.

Ayon kay Securiport LLC Chief Technology Officer Nate Carpenter, makatutulong ang mo­dernong border-control technology gaya ng bio­metric screening, pre-travel data collection at e-gates upang mas mabilis na matukoy ang posibleng banta at mapalakas ang seguridad laban sa human trafficking, drug smuggling, terrorism at iba pang transnational crimes. (Doris Franche-Borja)