MANILA, Philippines — Nilinaw kahapon ng Department of Health (DOH) na ang pagiging full capacity ng dalawang pagamutan sa lungsod ng Maynila ay hindi dulot ng ispesipikong karamdaman.
Ang paglilinaw ay ginawa ni DOH Spokesperson at Assistant Secretary Albert Domingo matapos ianunsiyo ng Manila City government nitong weekend na ang Ospital ng Maynila Medical Center at Gat Andres Bonifacio Medical Center ay nag-o-operate na ng full capacity o limitadong espasyo.
Pinayuhan ng dalawang ospital ang mga pasyente na ikonsidera ang pagpunta sa ibang public hospitals dahil sa puno na sila ng pasyente, para agarang mabigyan ng kinakailangang atensiyong medikal.
“The two hospitals have not reported any specific disease or incident that may be causing their full capacity,” diin naman ni Domingo.
Tiniyak din niya na nakikipag-ugnayan na sila sa lokal na pamahalaan ng Maynila at sa pamunuan ng dalawang pagamutan hinggil dito.
Una nang tiniyak ni Manila Mayor Honey Lacuna na wala silang tinatanggihang pasyente na pupunta sa kanilang mga pagamutan.