MANILA, Philippines — Patay na ang isang mister nang madiskubreng nakahandusay sa bangketa matapos na umano’y maatrasan ng isang sasakyan habang naglalakad sa Sampaloc, Manila kahapon ng madaling araw.
Ang biktima ay nakilalang si alyas “Angelito”, tinatayang nasa 55-60 taong gulang, at residente ng Don Quijote St., sa Sampaloc, Maynila habang ang nakabanggang suspek ay kinilalang si alyas “Rafael” ng Florentino St., sa Sampaloc.
Batay sa initial report ng Investigation Section ng Sampaloc Police Station (PS-4) ng Manila Police District (MPD), dakong alas-6:40 ng umaga nang madiskubre ang bangkay ng biktima sa bangketa sa tapat mismo ng gate ng tahanan ng suspek.
Naglalakad umano sa lugar ang testigong si Danilo Soriano, barangay kagawad ng Brgy. 478, nang makita ang bangkay kaya’t kaagad na ini-report sa mga awtoridad.
Kaagad namang nagsagawa ng backtracking ang mga barangay officials sa lugar, at natukoy sa CCTV footage na naatrasan umano ng suspek ang biktima, habang minamaneho ang kanyang kulay itim na kotse, na nagresulta sa kamatayan nito, dakong alas-5:07 ng madaling araw.