MANILA, Philippines — Natanggap na ni Paris Olympics double gold medalist Carlos Edriel P. Yulo ang P2 milyong cash incentives na ipinagkaloob sa kanya ng Manila City Government, bilang pagkilala sa karangalang inihatid niya sa bansa.
Sa isang simpleng seremonya, na isinagawa sa Bulwagang Villegas ng Manila City Hall, personal na iniabot ni Manila Mayor Honey Lacuna kay Yulo ang isang symbolic check para sa naturang cash incentives.
Bukod naman sa naturang insentibo, nilagdaan na rin ni Lacuna ang ordinansa na ipinasa ng Manila City Council, sa pamumuno ni Vice Mayor Yul Servo, na nagtatakda sa Agosto 4, bilang “Araw ni Carlos Yulo” sa lungsod.
Paglilinaw naman ni Lacuna, ang naturang special day ay hindi holiday, kundi panahon nang pag-alala sa pagkapanalo ni Yulo ng kanyang unang gold medal sa Paris Olympics.
Anang alkalde, ang naturang “Araw ni Carlos Yulo” ay taunang okasyon upang suriin ang pag-unlad na nagawa sa patuloy na pagpupursige ng Maynila at Pilipinas na makabuo ng mas maraming Olympians at manalo ng mas maraming Olympic medals.
Samantala, nabatid din na layunin nina Yulo at Gymnastics Association of the Philippines President Cynthia Carrion na makapagpadala ng isang men’s team at women’s team sa susunod na Olympics sa Los Angeles.