MANILA, Philippines — Tuloy ang motu proprio complaint na inihain ng Commission on Elections (Comelec) laban kay Alice Guo dahil sa kasong material misrepresentation, kahit pa nagdesisyon na ang Office of the Ombudsman na tuluyan na siyang i-dismissed sa serbisyo bilang alkalde ng Bamban, Tarlac dahil sa “grave misconduct”.
Sa panayam sa radyo, sinabi ni Comelec Chairman George Erwin Garcia na walang anumang epekto sa kanilang kaso laban kay Guo ang desisyon ng Ombudsman kaya’t tuluy-tuloy lamang aniya ito.
“Tuloy na tuloy po sapagkat wala pong epekto sa amin ang desisyon ng ating Office of the Ombudsman,” ayon pa kay Garcia.
“Ang Office of the Ombudsman sabi niya perpetually disqualified, tama po ‘yun. Pero sa amin, lahat ng kandidatong magsisinungaling sa certificate of candidacy o tinatawag natin na misrepresentation, ay kinakailangang humarap sa kasong criminal,” dagdag nito.
Sinabi ng poll chief na sa ngayon ay inaantabayanan pa nila ang tugon ng kampo ni Guo na una na nilang pinadalhan ng subpoena kaugnay sa kaso.
“Hinihintay na namin ang kanyang magiging sagot sampung araw matapos namin mai-serve ang tinatawag natin na subpoena. Again, hindi ito hihinto dahil lang sa desisyon ng ibang korte o ibang opisina,” aniya pa.
Matatandaang una nang napatunayan ng Comelec at ng National Bureau of Investigation (NBI) na ang fingerprints ni Guo at ng Chinese national na si Guo Hua Ping ay iisa.
Noong nakaraang linggo naman, ipinag-utos na ng Office of the Ombudsman ang pag-dismiss kay Guo sa serbisyo dahil sa kasong grave misconduct.