MANILA, Philippines — Ipinagmalaki ng Philippine National Police (PNP) at Department of Interior and Local Government (DILG) ang bagong e-911 services na gagamitin sa pagresponde sa iba’’t ibang emergency kabilang ang mga krimen.
Sa pamamagitan ng makabagong teknolohiyang katulad ng sa Amerika magiging mas mabilis at sentralisado na ang pagtanggap ng ulat ng PNP command center.
Ang simulation na pinalakas na e- 911 hotline service na sinaksihan ni Interior and Local Government Secretary Benhur Abalos ay ipinakita ni PNP Chief General Rommel Francisco Marbil, gamit ang e-911 at makaresponde sa loob ng tatlong minuto.
Ani Marbil, madaling napi-pinpoint ng e-911 ang lokasyon ng isang caller para sa agarang deployment ng mga rerespondeng pulis maging sa mga tauhan ng bumbero.
Sa simulation kahapon, isang insidente ng robbery sa gasolinahan sa Quezon City ang scenario kung saan wala pang 1 minuto ay nakaresponde agad ang mga pulis.
Ang e-911 naman ay pwedeng tawagan ng publiko ng libre kahit wala load ang mga cellphone.