MANILA, Philippines — Patay ang isang 39-anyos na lalaki nang barilin ng riding-in-tandem habang nakatayo sa tapat ng isang bahay, sa Tramo St., Pasay City, kamakalawa ng hapon.
Kinilala sa alyas na Tintoy ang biktimang residente rin ng lugar.
Sa ulat ng Pasay City Police Station, dakong alas -3:20 ng hapon nang maganap ang insidente sa Tramo St, sakop ng Barangay 100.
Sa imbestigasyon, nakatayo lamang ang biktima nang sumulpot ang gunman at walang sabi-sabing paputukan ito at agad na sumakay sa nakaantabay na motorsiklong minamaneho ng isa pang lalaki at umarangkada sa direksyon ng Protacio St.
Sa pagresponde ng mga tauhan ng Pasay Sub-Station 4, nadatnan na nakahandusay sa sementadong kalye na duguan ang biktima kaya isinugod sa Pasay City General Hospital na idineklarang patay na.
Patuloy pa ang imbestigasyon at backtracking sa mga nakalap na CCTV footages para matunton ang mga suspek.