MANILA, Philippines — Dahil sa matinding pinsalang dulot ng bagyong Carina, pansamantala munang isinara ng Land Transportation Office ang kanilang mga tanggapan sa National Capital Region.
Batay sa inilabas na abiso ng LTO, kabilang dito ang Traffic Adjudication Section, New Registration Unit, at G. Araneta Licensing Section gayundin ang La Loma District Office sa LTO-NCR sa Quezon City.
Kaugnay nito, nagtayo ang ahensya ng public assistance desk na siyang mag-aasikaso sa mga magtutungong aplikante na hindi alam ang abiso.
Nagpapatuloy ang pagsasagawa nito ng paglilinis sa kanilang mga tanggapan na wala pa ring supply ng kuryente, at maging internet.
Sa ngayon, wala pang abiso kung kailan maibabalik ang kanilang serbisyo at humingi ng paumanhin ang LTO sa publiko lalo na sa mga may transaksyon sa kanilang mga tanggapan.