MANILA, Philippines — Dead-on-the-spot ang isang habal-habal driver nang pagbabarilin ng dalawang lalaking magka-angkas sa motorsiklo, sa Makati City, Biyernes ng gabi.
Kinilala ang nasawi na si Nelson Cutamora, 37, habal-habal driver at vendor sa Pasong Tamo area, at residente ng Pasay City.
Sa ulat ng Investigation and Detective Management Section ng Makati City Police Station, dakong alas-9:25 ng gabi ng Hulyo 26 nang maganap ang insidente sa Osmeña Highway, northbound loading/unloading bay ng PNR Magallanes Interchange, sa Barangay Magallanes, Makati.
Sa imbestigasyon, ilang bystander ang nakarinig ng mga putok , habang ang isa sa suspek ay nagsabi pa ng “Ang yabang mo!”.
Matapos ang pamamaril ay tumakas ang mga suspek sa direksyon ng Maynila.
Rumesponde ang mga bantay bayan ng Makati na tumawag sa pulisya.
Narekober ng SOCO ang 6 na basyo ng bala ng kalibre .45 baril.
Patuloy pang inaalam ang pagkilanlan ng mga suspek at ang motibo sa krimen.
Sa pahayag ng kapatid na lalaki ng biktima, maraming inutangan ang kaniyang kapatid at madalas umanong magsugal.
Isa sa titingnang motibo kung may kinalaman sa utang at pagsusugal ang pamamaril.