MANILA, Philippines — Ipinag-utos na ng korte ang pag-aresto sa isang pulis-Maynila na umano’y nanagasa gamit ang isang van ng mga raliyistang nagsasagawa ng kilos-protesta, sa may US Embassy sa Maynila noong Oktubre 19, 2016.
Batay sa kautusan ng Manila Metropolitan Regional Trial Court Branch 7, na ipinost sa social media ni Bagong Alyansang Makabayan (Bayan) president Renato Reyes Jr., nabatid na nagpalabas ng arrest warrant ang korte laban kay Police Staff Sergeant, dating Police Officer 3, Franklin Kho.
May kaugnayan ito sa kinakaharap niyang tatlong bilang ng kasong attempted homicide dahil sa naturang insidente.
Nabatid na nagrekomenda naman ang hukuman ang tig-P36,000 piyansa sa bawat bilang ng kaso para sa pansamantalang kalayaan ng akusadong pulis.
Samantala, itinakda na rin ng hukuman ang arraignment at pre-trial ng kaso sa Setyembre 2, 2024.