MANILA, Philippines — Patay ang isang lalaki habang sugatan ang kapatid nito nang saksakin ng isa sa mga suspek na kanilang nakagitgitankamakalawa ng gabi sa San Juan, Batangas.
Dead-on-arrival sa San Juan Doctors Hospital ang biktimang si Michael Baldeo Birtania, 37-anyos, habang inoobserbahan ang kuya nitong si Adrian, 38; kapwa residente ng Brgy. Palingowak ng nasabing bayan.
Nakilala naman ang mga suspek sa pangalang “Roldan”, “Victor” at isang “John Doe” na pawang residente ng Brgy. Poctol, San Juan, Batangas.
Sa imbestigasyon ng Batangas Provincial Office, alas-9:10 ng gabi habang sakay ang magkapatid na biktima ng tricycle nang makaalitan nila sa daan ang mga suspek na sakay naman ng motorsiklo sa Brgy. Poctol, San Juan.
Nasilaw umano sa ilaw ng tricycle ang mga suspek na kanilang ikinairita hanggang sa magkompontrontahan at nagkaroon ng mainitang pagtatalo sina Michael at Roldan na humantong sa pananaksak ng una sa huli.
Sumaklolo naman sa kanyang nakababatang kapatid na si Adrian subalit maging siya ay inundayan din ng saksak ni Roldan.
Nang kapwa duguang humandusay ang magkapatid ay mabilis na tumakas ang mga suspek na tinutugis na ng mga awtoridad.