MANILA, Philippines — Nagka-tensyon sa ginawang clearing operation ng Metro Manila Development Authority (MMDA) sa Banahaw Street Veterans Village sa Quezon City.
Ito ay nang umalma ang mga may-ari ng mga sasakyan sa lugar na pinaghahatak ng mga tauhan ng MMDA dahil sa illegal parking.
Nagsagawa kahapon ng umaga ang MMDA ng anti illegal parking operation sa Veterans Village dahil sa mga reklamo laban sa mga sasakyang illegal na nakaparada sa lugar na nagdudulot nang pagbagal at traffic sa naturang kalsada.
Sa apat na sasakyan ng isang residente doon, dalawa dito ang hahatakin sana subalit nagkaroon ng pagkakataon ang car owner na matanggal ang kable.
Sinabi ni MMDA Strike Force Cabel Go na ginagampanan lamang nila ang kanilang tungkulin dahil bawal ang magparada ng sasakyan sa mga kalsada.
Gayunman, upang humupa ang tension sa lugar, hindi na hinatak ng MMDA ang mga illegal na nakaparadang sasakyan sa lugar matapos pairalin ang pasensya at pang-unawa. Binigyan ng panahon ng MMDA ang mga car owners na humanap ng mas maayos na lugar para iparada ang kanilang mga sasakyan.
Niliwanag naman ng pamunuan ng barangay sa Veterans Village na aayusin nila ang tungkol sa problemang ito tulad ng pagpapatupad ng ordinansa para maging one-way ang kalsada at magkaroon ng one side parking doon para maiwasan ang matinding trapik sa lugar.