MANILA, Philippines — Inaresto ng mga tauhan ng Philippine National Police (PNP) ang ina ng beauty queen na si Maggie Wilson dahil sa kasong carnapping sa Taguig City, kahapon.
Sa impormasyon mula sa PNP Public Information Office, nadakip ang 64-taong gulang na ina ni Wilson dakong alas-9:55 ng umaga sa may Brgy. Ususan, ng naturang siyudad.
Ayon kay PNP PIO chief, PCol Jean Fajardo, inihain ng mga tauhan ng Taguig City Police ang warrant of arrest sa suspek dahil sa kasong paglabag sa Republic Act 10883, o ang New Anti-Carnapping Act.
Inilabas ang warrant ni Judge Antonio Olivete ng Taguig Regional Trial Court Branch 267.
Inihayag din ni Wilson sa kaniyang social media account ang pag-aresto sa kaniyang ina. Ipinagtataka niya kung paano nadawit ang kaniyang ina sa carnapping, gayung hindi umano ito marunong magmaneho at walang driver’s license.
Nagtakda ang korte ng P300,000 halaga ng piyansa para sa pansamantalang paglaya nito.