MANILA, Philippines — Sugatan ang isang ginang at dalawa niyang anak kabilang ang isang 4-anyos na batang lalaki makaraang madaganan ang kanilang sasakyan ng isang cement mixer truck, sa Caloocan City.
Nakilala ang mga biktima na sina Sharon Sy, ang kanyang anak na si Danica, 20 at Lanlan Rafael.
Nabatid sa ulat na lulan ang mag-iina sa kanilang pulang Hyundai Velester at bumabaybay sa intersection ng 10th Avenue at A. De Jesus St., Brgy. 104 kung saan paparating naman ang rumaragasang mixer truck na may plakang ZKT-803. Dahil sa sobrang bilis ng takbo, tuluyan itong tumagilid at bumagsak sa mismong sasakyan ng mag-iinang biktima.
Mabilis na tumakas ang driver at helper ng mixer truck matapos ang naganap na aksidente, habang agad namang hinila sa loob ng kanilang sasakyan ang mga biktima at isinugod sa pagamutan.
Nakikipag-coordinate na rin ang pulisya sa Land Transportation Office para matukoy ang may-ari ng truck at makilala ang driver nito.