MANILA, Philippines — Ibabahagi na lamang ni Manila Mayor Isko Moreno sa mga pamilyang apektado ng pagputok ng Bulkang Taal ang kanyang talent fee na aabot sa P4 milyon.
Kamakalawa ay pumirma si Moreno ng kanyang kontrata sa kompanyang Novuhair. Dalawang milyon ang kontrata niya rito na ibibigay niya para sa lalawigan ng Batangas.
Nabatid na ang P2 milyon pa na mula naman sa KJA Food Summit Corporation ay inilaan naman ni Moreno sa mga biktima ng Taal.
Ayon kay Moreno, marami pang kailangan ang mga taga-Batangas lalo na at hindi maikakaila ang lawak na dulot ng pagsabog ng bulkan at ashfall sa mga kabahayan, pananim at hayop.
Sa huling abiso ng Phivolcs, nananatili pa rin sa Alert Level 4 ang Bulkang Taal.