MANILA, Philippines – Napisak ang ulo ng isang lady project engineer matapos na magulungan ng isang trailer truck na nakabangga sa sinasakyan niyang motorsiklo sa Brgy. Manggahan, Pasig City, kamakalawa ng gabi.
Ang biktima ay nakilalang si Vanessa Santos, 26, isang project engineer, habang arestado naman ang driver ng trailer truck na si Ronaldo Rosero, 52.
Batay sa ulat ng Pasig City Police, nabatid na dakong alas-11:20 ng gabi nang maganap ang insidente sa Amang Rodriguez Avenue sa Brgy. Manggahan.
Lumilitaw na bago ang aksidente ay nakaangkas ang biktima sa isang Yamaha Motorcycle, na minamaneho ni Belly Rhay Santos nang bigla na lamang silang masalpok ng paparating na trailer truck, na bumabagtas din sa naturang lugar.
Dahil sa impact nang pagkabangga ay nabuwal ang motorsiklo at nahulog ang biktima sa sementadong kalsada at minalas na masagasaan pa ang ulo nito ng unahang kanang gulong ng trailer truck, na nagresulta sa kanyang agarang kamatayan.
Arestado naman at sasampahan ng kasong Reckless Imprudence Resulting in Homicide and Damage to Property ang suspek.