Akyat-bahay na-‘wow mali’
MANILA, Philippines — Isa sa dalawang miyembro ng ‘Akyat Bahay Gang’ ang naaresto matapos tangkain pang gahasain ang natutulog na biktima na inakala niyang babae pero ‘yun pala ay lalaki sa Quezon City kahapon ng madaling araw.
Ang suspek ay kinilalang si Jeff Baluyot, 29, residente ng Brgy. Palanggang Dinalupihan Bataan.
Sa imbestigasyon ng Quezon City Police District (QCPD) Station 9, nabatid na dakong alas-4:30 ng madaling araw nang pasukin ng suspek at isa pa nitong kasama ang isang bahay sa Project 2, Quezon City.
Matagumpay na nakulimbat ng dalawang suspek ang iba’t ibang gamit tulad ng kanyang wallet, sling bag, relo at pera na nagkakahalaga ng P50,000.
Papalabas na sana ang dalawang suspek sa inakyat nilang tahanan nang bumalik si Baluyot sa kuwarto ng biktima na noon ay mahimbing na natutulog at nakakumot.
Unti-unting, itinaas ng suspek ang kumot saka hinubaran nito ng pang-ibabang suot ng biktima para sana gahasain, pero nagulat ito na lalaki rin ang natutulog na biktima kaya ito nagising at agad na sinipa.
Nagtatakbo ang suspek pero hinabol siya ng biktima at agad na nakahingi ng tulong sa mga awtoridad na nagresulta ng pagkakaaresto ni Baluyot habang nakatakas naman ang kanyang kasama.
Nabawi pa ang ilang gamit ng biktima mula sa nadakip na si Baluyot habang ang ibang gamit ay tuluyang natangay ng nakatakas na suspek.
Nahaharap ngayon si Ba-luyot sa kasong theft at acts of lasciviousness habang nagsasagawa pa ng follow-up operation ang mga awtoridad para madakip din ang kanyang kasama.
- Latest
