Drug suspect itinumba
MANILA, Philippines - Hindi na umabot ng buhay sa ospital ang isang 28-anyos na lalaki na umano ay sangkot sa droga nang ito ay pagbabarilin ng hindi pa kilalang suspek habang nasa harap ng kanilang bahay sa Barangay Payatas A, Quezon City, kahapon ng madaling araw.
Ang nasawi ay kinilalang si Michael Abay, ng 004 San Juan Bautista St., Brgy. Payatas-A.
Sa ulat, dakong alas-2:40 ng madaling araw ay nagising sa putok ng baril si Mateo Abay na nagmula sa labas.
Nang kanyang tignan ay nakita ang kapatid na nakahigang duguan kaya’t agad nilang itinakbo ito sa East Avenue Medical Center, subalit idineklarang dead on arrival.
Narekober sa crime scene ang limang basyo ng bala ng kalibre .45, dalawang tingga, isang fired jacket fragment, isang rolyo ng aluminum foil at isang plastic sachet ng shabu. Kaya’t malaki ang hinala ng pulisya na may kaugnayan sa droga ang krimen.
- Latest
