MANILA, Philippines – Patay ang isang 30 anyos na killer na sinasabing responsible sa pagpatay ng dalawang katao matapos na manlaban sa mga pulis-Maynila na aaresto sana sa kanya kahapon ng umaga sa Tondo,Maynila.
Dead on the spot si Renato Santiago, miyembro ng Sputnik gang at taga Osmeña St. Tondo, Maynila dahil sa tama ng bala sa iba’t ibang bahagi ng katawan.
Ayon kay PO3 Roderick Magpale, ng Manila Police District-homicide section, naganap ang insidente dakong alas 4 ng madaling araw sa may Osmeña St. Tondo,Maynila.
Sinabi ni Magpale na inamin ng suspek kay Shirley Fuentes,21, ang pagpatay nito kay Ronald Ramos, sa loob ng isang pedicab dakong alas 12:30 ng madaling araw, ilang oras bago napatay ang suspek.
Ang suspek din umano ang pumatay sa biktimang si Jonel Flaviano, dakong alas 11:50 ng gabi sa may Capulong corner Velasquez St. noong Disyembre 30.
Nabatid na si Fuentes umano ang nagbigay ng impormasyon sa pulisya sa kinaroroonan ng suspek at nang puntahan sa halip na sumuko pinaputukan nito si PO2 Dylan Verdan na nakapagkober at nang gantihan ng putok dito na tinamaan ang suspek na naging sanhi ng kanyang kamatayan.
Narekober ng mga pulis ang .38 kalibre ng baril sa suspek.