MANILA, Philippines – Nasa malubhang kalagayan ang isang 29-anyos na babae nang burdahan ng saksak sa iba’t ibang bahagi ng katawan ng kaniyang bayaw habang sakay ng pampasadang dyip, sa Tondo, Maynila, kahapon ng umaga.
Isinailalim sa surgical operation sa Jose Reyes Memorial Medical Center (JRMMC) ang biktimang si Ann Marie Sapnu, ng no. 4367 L. Bernardino St., J. de Leon, Valenzuela City dahil sa dami ng saksak sa katawan.
Nagtatago na umano ang suspek na si George Canceran, 42, welder, nakatira rin sa nabanggit na address at kapatid ng kinakasama ng biktima na si Rodel Carceran, 40.
Sa ulat ni PO2 Wendham dela Cruz, ng Manila Police District-station 2, naganap ang insidente dakong alas 5:30 ng umaga sa Antonio Rivera St. Tondo.
Magkasama umano ang biktima at ang ka-live-in sa pamamasada ng dyip nang pagsapit sa lugar ay sumakay ang suspek at walang sabi-sabing pinag-uundayan ng saksak ang biktima at tumakas.
Patuloy pang inaalam ang motibo at kung saan nagtatago ang suspek.