MANILA, Philippines – Arestado ang isang hinihinalang gunrunner sa isinagawang buy-bust operation, kamakalawa ng gabi sa Caloocan City.
Nakakulong ngayon sa Caloocan City Police detention cell ang suspek na si Michael Robles, 34, ng Block 4,Sawata St., Brgy. 35 ng naturang lungsod.
Nabatid, na nagsagawa ng isang linggong surveillance ang Northern Police District Special Operations Unit (NPD-SOU) laban sa suspek.
Alas-11:00 ng gabi ay naglunsad ng buy-bust operation ang mga pulis sa naturang lugar gamit ang halagang P2,500 marked money para bumili ng isang homemade .38 caliber revolver at 11 pirasong bala nito na nagresulta sa pagkakadakip sa suspek.
Ang suspek ay sinampahan ng kasong paglabag sa Section 26 under R.A. 10591 (unauthorized sell of firearm and ammunition) at paglabag sa Omnibus Election Code.