MANILA, Philippines – Inaresto ng mga tauhan ng Marikina City Police ang 4 na sugarol na gumamit ng shabu bilang pusta sa Marikina City, kahapon ng umaga.
Kinilala ni Marikina City Police chief P/Senior Superintendent Vincent Calanoga ang mga suspek na sina Marvin Sumang; Jeffrey Atacador; Bernabe Jelacio at William Ponion, pawang nasa hustong gulang at residente ng naturang lungsod.
Sa ulat, nabatid na dakong alas- 7:30 ng umaga ng arestuhin ang mga suspek sa Socorro Public Market sa Brgy. Sta. Elena, habang naglalaro ng cara y cruz at ginagamit na pusta ay shabu.
Nagsasagawa ang mga pulis ng operasyon sa lugar nang mapansin ang grupo na nagsusugal kaya’t kaagad na inaresto ang mga ito.
Narekober mula sa mga suspek ang tatlong pirasong plastic sachet ng shabu.
Ang mga suspek, na detenido na, ay nahaharap na sa kasong paglabag sa Republic Act 9165 at PD 1602.