MANILA, Philippines – Hindi nakayanan ng isang 11-anyos na batang babae ang usok na nagsimula sa nasusunog nilang bahay kahapon ng hapon sa Tondo, Maynila.
Kinilala ang nasawing si Maria Jasmin Domingo, residente ng nasunog na bahay na may address na no. 1042 New Antipolo St., Tondo, Maynila.
Sa inisyal na ulat mula sa Manila Fire Bureau, dakong alas-12:00 ng hapon nang magsimula ang sunog sa bahay ng pamilya Domingo at naapula pagsapit ng alas 12:40 ng hapon dahil sa mabilis na pagtutulungan ng mga kapitbahay na mapigil ang apoy at pagdating na rin ng mga bumbero
Walang nadamay na ibang kabahayan subalit bigo na makalabas ng bahay ang biktima na natagpuang patay matapos ang clearing operation.
Patuloy pang iniimbestigahan ang insidente upang matukoy ang sanhi ng sunog at kung gaano kalaking halaga ang napinsala nito.
Samantala, isang sunog din ang sumiklab sa Juan Luna St., sa Tondo, Maynila dakong ala-1:32 sa warehouse na nasa ikaapat na palapag ng KP Tower sa Juan Luna St, panulukan ng Claro M. Recto, Binondo, Maynila.
Umabot sa ikalimang alarma ang sunog na idineklarang fire out dakong alas- 3:30 ng hapon. Patuloy pa ang imbestigasyon sa sanhi ng sunog.