MANILA, Philippines – Isang ginang na real estate agent at kaibigan nitong lalaki ang sugatan matapos na pagbabarilin habang nag-uusap sa tapat ng isang conveniece store sa Mandaluyong City kamakalawa ng gabi.
Agad na isinugod sa Mandaluyong City Medical Center sina Thelma Dapitan, 53, may asawa na nakatira sa Malvar, Batangas at Jose Crame Jr. 57, self employee ng Sta. Ana, Manila.
Nabatid na dakong alas-9:30 ng gabi ng naganap ang insidente sa tapat ng Mini stop store sa Barangka Drive, Brgy. Plainview, Mandaluyong City.
Ayon sa report, nag-uusap ang dalawang biktima nang huminto sa kanilang harapan ang isang motorsiklo na sakay ang dalawang suspek at walang sabi-sabing pinagbabaril sila at saka mabilis na tumakas.
Isinugod naman sa hospital ang mga biktima kung saan si Crame ay tinamaan ng bala ng kalibre 45 baril sa dibdib habang si Dapitan ay tinamaan sa balikat.
Nagsasagawa pa ng follow up operation ang mga awtoridad para matukoy ang motibo ng pamamaril at madakip ang mga suspek.