MANILA, Philippines – Muling sumalakay ang grupo ng ‘Gapos Gang’ sa isang pamilya sa Las Piñas City, kamakalawa ng gabi.
Kinilala ni Senior Supt. Jemar D. Modequillo, hepe ng Las Piñas City Police ang mga biktimang sina Dennis Guevarra, 39, empleyado ng Graphic Art Magazine at DWIZ at ang misis nitong si Rosario, maging ang tatlo nilang bisita sa kanilang bahay sa Ford Avenue Greenview, Manuela IV-I, Brgy. Pamplona Real ng naturang lungsod.
Base sa isinagawang imbestigasyon ng Las Piñas City Police, naganap ang insidente alas-9:00 ng gabi sa loob ng bahay ng mag-asawa habang abala ang mga ito sa pag-eentertain sa kanilang mga bisita nang biglang may kumatok sa kanilang pinto at pinagbuksan naman ng mag-asawa at hinahanap ang isang nagngangalang Gerald.
Sinabi ng mga biktima na walang nakatirang Gerald kasunod nito ay hinataw ng baril sa ulo ng isa sa mga suspek si Dennis hanggang sa nawalan ito ng malay. Tuluy-tuloy nang pumasok sa bahay ang mga suspect kung saan iginapos na ng mga suspek ang misis ni Dennis na si Rosario habang ang kanilang 2-anyos na anak at ang kanilang tatlong bisita ay ikinulong sa comfort room.
Nagsimula ng maghalughog ang mga suspek at tinangay ng mga ito ang mga mahahalagang kagamitan tulad ng laptop at mga cellphone, pera at mga alahas.
Pagkatapos nito ay mabilis na tumakas ang mga suspect. Nang balikan ng malay si Dennis ay dito niya nakita ang nakagapos na misis, anak at mga bisita at dali-dali niya itong kinalagan at nagtungo sila sa himpilan ng pulisya upang i-report ang insidente.