MANILA, Philippines – Kapwa kritikal ang isang 6-taong gulang na batang lalaki at tiyuhin nito nang biglang pagtatagain ng kanilang kapitbahay sa Caloocan City, kamakalawa ng gabi. Isinugod sa Dr. Jose Rodriguez Hospital ang mga biktimang sina Roberto Jomuad, Jr., 30, ng Brgy. 178 Camarin, at ang pamangkin nito na si Ace Stanley. Arestado naman at nahaharap ngayon sa mga kasong double frustrated homicide at child abuse ang 58-anyos na si Eduardo Baculo, kapitbahay ng mga biktima. Sa inisyal na ulat ng Caloocan City Police, naganap ang krimen dakong alas-11:45 ng gabi sa tapat ng bahay ng magtiyo.
Nabatid na kinukumpuni ni Jomuad ang kanyang motorsiklo habang nanonood naman ang batang pamangkin nang bigla silang atakihin ng suspek. Unang tinaga ng suspek si Jomuad, tinamaan rin ng taga ang batang si Stanley sa ulo at kanang kamay. Nang duguang bumagsak ang mga biktima, kaswal lamang umanong naglakad palayo ang suspek habang isinugod ng mga kaanak ang mga biktima sa pagamutan. Naaresto naman si Baculo ng mga rumespondeng tauhan ng Police Community Precinct 5 sa harap ng bahay nito ngunit hindi na narekober ang bolo na ginamit sa krimen.