MANILA, Philippines – Humihingi ngayon ng proteksiyon sa pulisya ang misis ni Rolando Reformado, na pumatay sa kanyang tatlong anak noong Setyembre 1 sa Sampaloc, Maynila.
Sa pahayag ni Angelie Reformado, 36, ng no. 1862 Dapitan st. Sampaloc, Maynila kay SPO1 Alonzo Layugan, ng Manila Police District-Homicide Section, pinahihigpitan niya ang pagbabantay sa kanyang mister na si Rolando, 33, na nakapiit sa MPD Integrated Jail kaugnay sa pagpatay sa mga anak na sina Jonel, 14; Junli, 9 at Janel, 5.
Aniya, kahit nakakulong na ito ay patuloy pa sa pagseselos at nagbanta sa kanya.
“Sabi niya sa nanay niya nung dalawin siya na ...”iparating niyo sa asawa ko na pipilitin kong makatakas dito para patayin siya”, sinabi yun ng kapatid niya sa akin kasi dumalaw yung nanay nila nung Sabado,” ani Angelie.
Nabatid na noon lamang Biyernes inilipat sa Integrated Jail ang suspek mula sa Homicide detention cell.
Bagamat umamin naman si Rolando sa kaniyang sinabi, nangatwiran pa ito na sa “palagay niyo ba magagawa ko pa iyon sa kanya sa kalagayan ko ngayon, kahit nga bitayin ako tatanggapin ko na”.