MANILA, Philippines – Hinikayat ni Quezon City Vice Mayor Joy Belmonte ang publiko na e-promote ang urban farming at breastfeeding sa lungsod para malabanan ang problema sa malnultrisyon.
Ang hakbang ay ginawa ni Belmonte nang pangunahan ang paglulunsad sa National Nutrition Council (NNC) ‘10 Kumainments’ campaign na layong magkaroon ng tamang nutrisyon at healthy eating habits sa bawat komunidad laluna sa mahihirap na lugar sa lungsod.
Sinabi ni Belmonte na ang kanyang tanggapan ay handang mamigay ng starter kits na kapapalooban ng mga punla ng pananim na mga gulay tulad ng pechay, kamatis,talong, okra at iba pa, soil compost at gardening equipment sa mga interesado sa Urban Farming Program.
Katulong naman ng city health department ang NCC-National Capital Region sa pagpapatupad ng ‘10 kumainments’campaign tulad ng tamang pagkain ng masustansiyang pagkain, pag-eehersisyo, pagtulog ng maaga at paggising ng maaga, na isa sa tampok na aktibidad sa pagdiriwang ng Nutrition month ngayong buwan.
Partikular na benepisyaryo ng programang ito ang Pantawid Pamilyang Pilipino Program (4Ps) ng Department of Social Welfare and Development (DSWD) .
Bukod sa pagpo-pomote sa tamang nutrisyon sa komunidad, ang city health department ay nakipagkasundo din sa Division of City Schools para sa pagpo-promote ng tamang nutrisyon at healthy eating habits sa mga kabataang mag-aaral sa lahat ng pampublikong paaralan.