Trader utas sa ambush
MANILA, Philippines – Patay ang isang 31-anyos na negosyante nang barilin sa mukha ng isang hindi pa kilalang salarin habang naglalakad patungo sa kanyang nakaparadang sasakyan sa panulukan ng Carriedo at Bustos Sts., Sta. Cruz, Maynila, kamakalawa ng gabi.
Binawian ng buhay sa Jose Reyes Memorial Medical Center (JRMMC) habang sinusubukang isalba ang biktimang kinilalang si Fritz Linjohn Chu, negosyante at residente ng Block 5, Lot 7, Garden City, Sucat, Parañaque City.
Sa ulat ni SPO3 Glenzor Vallejo, naganap ang insidente alas-7:30 ng gabi kamakalawa sa Carriedo St.
Pauwi na umano ang biktima at habang patungo sa kanyang sasakyan na Toyota Vios na nakaparada sa ibaba ng LRT Carriedo station nang biglang sumulpot sa kanyang likuran ang gunman.
Nabatid na noong nakalipas na linggo umano ay may nagalit na kostumer sa biktima at bago umalis sa kanyang repair shop ay nagbanta na “Kayang-kaya kitang patayin!”, habang isang parking boy din naman ang nakaalitan din ng nasawi may tatlong linggo na ang nakakalipas sa Rizal Avenue, malapit lamang sa tindahan nito na Chu Tech Solution na nasa ground floor ng Parkson Square sa Rizal Avenue. Sa dalawang insidenteng ito nakatutok ang mga awtoridad.
Nagtamo ng tama ng bala sa ilong ang biktima at duguang bumagsak kaya isinugod sa pagamutan pero hindi rin naisalba ang buhay nito.
- Latest
