MANILA, Philippines - Lasog ang isang 18-anyos na estudyante matapos tumalon mula sa ika-6 na palapag ng isang car park, kahapon ng umaga sa Makati City.
Binawian ng buhay habang nilalapatan ng lunas sa Makati Medical Center (MMC) si Viam Madamba, nakatira sa Brgy. Magallanes Village, ng naturang lungsod at nag-aaral sa isang British school sanhi ng matinding pinsala sa katawan.
Sa report na natanggap ni Makati City Police Officer-In-Charge (OIC), Senior Supt. Ernesto Barlam, naganap ang insidente alas-6:30 ng umaga sa 6th level ng Dela Rosa Car Park, Dela Rosa St., Legazpi Village ng naturang lungsod.
Nabatid na nagtungo ang biktima sa naturang lugar at dito isinagawa ang pagpapakamatay sa pamamagitan nang pagtalon.
Kaagad na dinala ang biktima sa nabanggit na ospital at rumesponde naman ang mga pulis sa pinangyarihan ng insidente.
Pinuntahan ng mga imbestigador ng Homicide Section ng Makati City Police ang biktima sa nabanggit na ospital at doon nalaman sa mga kaanak na may problema umano ito sa kanyang pag-aaral, na hinihinalang isa sa dahilan ng pagpapakamatay.