Trike driver itinumba ng tandem

MANILA, Philippines – Utas ang isang tricycle driver makaraang pagbabarilin ng riding-in-tandem suspect habang ang una ay namamasada sa Brgy. Commonwealth  lungsod Quezon, iniulat kahapon.

Sa ulat ng Quezon City Police District Station 6, ang biktima ay nakilalang si Ro­berto Bejo, 30, ng nasabing barangay.

Sa ulat, nangyari ang insidente sa may bahagi ng Pilot Drive Sitio Balon MRB Building ng nasabing ba­rangay pasado alas-4 ng hapon.

Sinasabing namamasada ang biktima nang biglang sumulpot ang mga salarin sakay ng isang motorsiklo at sunud-sunod na pagbabarilin ang una hanggang sa mamatay.

Agad namang tumakas ang suspect matapos isagawa ang krimen.

Patuloy ang pagsisiyasat ng awtoridad kung ano ang motibo sa naturang krimen.