MANILA, Philippines – Huli sa akto ang isang kawatan na miyembro ng ‘Akyat-bahay gang’ matapos magsisigaw ang biktima nito sa Marikina City, kahapon ng umaga.
Ang suspek na ngayon ay nakakulong na sa Marikina police detention cell ay nakilalang si Adrian Estopare, 18.
Nakatakas naman ang kasama ni Estopare na si Jonald Pascual, 18.
Sa imbestigasyon ni SPO1 Charles Paquing, ng Criminal Investigation Unit (CIU) ng Marikina City Police, nabatid na dakong alas-5:00 ng umaga nang akyatin at pasukin ng mga suspek ang tahanan ng isang ginang na nakilalang si Maricris Habal, 40, ng Sitaw St., Libis Bulelak, Brgy. Malanday, sa lungsod.
Ayon kay Maricris, nagising siya dahil sa narinig na may naghahalughog sa kanyang kabilang kuwarto kaya sinilip niya ito.
Nang mabatid ni Maricris na ibang tao ay agad na nagsisigaw ito ng saklolo at mabilis namang nagresponde ang kanyang mga kapitbahay.
Nagtatakbo palabas ang dalawang suspek na nagresulta sa pagkakadakip ng isa sa kanila habang nakatakas naman ang isa pa.