MANILA, Philippines – Muli na namang sumalakay ang isang miyembro ng ‘Basag kotse gang’ matapos biktimahin ang sasakyan ng isang dalagang estudyante sa Makati City, kamakalawa ng gabi.
Kinilala ang biktimang si Isabella Kristine Braza, 18, ng Mariposa Village, BF Homes, Las Piñas City.
Ayon sa imbestigasyon ng Makati City Police, base sa pahayag ng biktimang si Braza, naganap ang insidente pasado alas-9:00 ng gabi sa harapan ng Mini Stop sa kahabaan ng Chino Roces Avenue, Brgy. Pio Del Pilar ng naturang lungsod.
Sandaling ipinarada ng biktima ang kanyang Toyota Fortuner sa naturang lugar para bumili lamang ng ice cream sa isang convenient store. Pagbalik ng dalaga ay napansin niya na basag ang salamin ng likuran ng kanyang sasakyan at dito niya nadiskubre na nawawala ang kanyang bag, na naglalaman ng pera at mahahalagang gamit.
Inaalam pa ng pulisya kung may nakakabit na CCTV camera sa naturang lugar upang matukoy ang pagkakakilanlan sa suspek.