MANILA, Philippines – Isang lalaki ang nasawi makaraang pagtulungang saksakin at bugbugin ng pitong lalaki sa lungsod Quezon, kamakalawa ng gabi.
Sa ulat ng Quezon City Police District-Criminal Investigation and Detection Unit, nakilala ang biktima na si Richard Palmario, 33, ng Bgy. Talipapa.
Ayon sa ulat ni SPO1 Cris Zaldarriaga, may-hawak ng kaso, nangyari ang insidente sa may Arty 2 St., malapit sa panulukan ng Mindanao Avenue, Bgy. Talipapa, ganap na alas 11:30 ng gabi.
Base sa pahayag ng mga testigong sina Christina at Alex Parungao, naglalakad umano sila sa lugar nang makita ang isang lalaki na hinahabol ng pitong lalaki na may bitbit ng bato at boteng walang laman.
Nang maabutan ang lalaki ay saka pinagtulungang bugbugin hanggang sa tuluyang iwang nakahandusay at wala ng buhay sa lugar.
Sa pagsisiyasat ng otoridad, lumabas na bukod sa mga sugat dulot ng pambubogbog ay nagtamo din ang biktima ng dalawang tama ng saksak sa kanyang katawan.
Patuloy ang imbestigasyon ng otoridad sa nasabing insidente.