MANILA, Philippines – Isang Hapones ang binaril at napatay ng hindi pa nakikilalang nakamotorsiklong salarin sa Las Piñas City kamakalawa ng gabi. Binawian ng buhay habang ginagamot sa Las Piñas General Hospital and Satellite Trauma Center ang biktimang si Shinsuke Toba, nasa hustong gulang. Hindi binanggit sa report kung saan ito pansamantalang nanunuluyan. Base sa report na isinumite sa tanggapan ni Las Piñas City Police Chief Sr. Supt. Adolfo Samala Jr., naganap ang insidente alas-11:30 ng gabi sa kahabaan ng C-5 Extension Road, Barangay Manuyo 2 ng naturang siyudad. Bumabagtas sa naturang lugar ang taxi na sinasakyan ni Toba kasama ng isa niyang kababayan nang pahintuin muna nila ang driver para umihi sa isang tabi. Nang huminto ang taxi, biglang sumulpot ang isang motorsiklo na hindi naplakahan na minamaneho ng suspek bago pinagbabaril ang biktima.