MANILA, Philippines - Patay ang isang 4th year high school student makaraang malapitang barilin sa ulo ng isang hindi pa nakikilalang salarin sa loob ng isang pampasaherong jeep, kahapon ng madaling araw sa Caloocan City.
Isinugod pa sa Our Lady of Lourdes Hospital ngunit nalagutan rin ng hininga dakong alas-6:30 ng umaga ang biktimang si Nicole Jan Macaranan, 17-anyos, estudyante ng Caloocan High School, at residente ng Victory St., Vista Verde Executive Subdivision North, Brgy. 166, ng naturang lungsod.
Sa inisyal na ulat ng Caloocan City Police, naganap ang krimen dakong alas-4:30 ng madaling araw sa tapat ng Vista Verde Subdivision, sa Gen. Luis Street, Kaybiga, Brgy. 166, ng naturang lungsod.
Ayon sa saksing si Rodrigo Penollar, driver ng pampasaherong jeep, kapwa lulan ng minamaneho niyang jeep ang biktima at ang salarin nang walang sabi-sabing barilin sa ulo si Macaranan. Bumaba umano sa sasakyan ang salarin matapos ang pamamaril at tumakas sa hindi nabatid na direksyon.
Patuloy naman na iniimbestigahan ng pulisya ang naturang krimen. Ilan sa kinukonsiderang anggulo ay maaaring panghoholdap o kaya naman ay planado ang pamamaslang.