MANILA, Philippines - Pormal nang pinalitan bilang District Director ng Quezon City Police si Chief Supt. Richard Albano ni Sr. Supt. Joel Pagdilao sa isang seremonya na ginanap sa Camp Karingal kahapon.
Sa kanyang huling talumpati sa harap ng mga dating tauhan, madamdaming nagpasalamat si Albano sa lahat maging sa miyembro ng media, concerned citizen, civic groups at mga barangay na dumalo sa naturang okasyon.
Tinapos ni Albano ang kanyang talumpati sa pagtawag sa buong pamilya nito sa entablado upang sama-samang magpaalam sa lahat bago ang pormal na seremonya ng pagpapalit ng liderato.
Maraming naging accomplishment ang QCPD sa pamumuno ni Albano, kabilang ang pagkakaresolba sa pagpatay kay Isabela Maconacon mayor Erlinda Domingo, ang racer car driver na si Enzo Pastor at ang huli ay ang pagkakadakip sa pumatay sa nanay ng actress na si Cherry Pie Picache.
Ang humalili sa kanyang puwesto na si Pagdilao na naging kanyang deputy district director at mistah sa PMA academy class 1984 ay nangako naman na ipagpapatuloy o paiigtingin pa ang naiwang programa ni Albano tulad ng ‘Oplan Lambat’.