MANILA, Philippines - Arestado ang isang tricycle driver na holdaper at isa pang kasabwat nito makaraang makahingi ng saklolo sa mga tanod ang kanilang binibiktima, kahapon ng madaling-araw sa Valenzuela City. Hindi na nakapalag ang mga suspek na sina Erwin Venzon at Geronimo Gile, Jr. nang mapalibutan sila ng mga nagrespondeng barangay tanod.
Sinampahan ang dalawa ng kasong robbery holdup at attempted murder ng biktimang si Jason Singidas, 28, ng Libra Street, ng naturang lungsod.
Sa ulat ng pulisya, sumakay ang biktima sa ipinapasadang tricycle ni Venzon habang nakaangkas si Gile dakong alas-2 ng madaling-araw upang magpahatid sa kanyang bahay.
Sa halip na ihatid sa kanyang tirahan, dinala ng dalawang suspek ang biktima sa loob ng Raminel Subdivision sa Vicente Reales at dito tinutukan ng patalim saka pilit na hinablot ang dalang bag.
Nanlaban ang biktima kaya’t inundayan siya ng saksak ni Venzon na nasangga naman ng kaliwang kamay ni Singidas sanhi upang masugatan. Nagawang makatakbo ng biktima at makahingi ng saklolo sa mga nagrorondang barangay tanod na nagresulta sa pagkakahuli sa mga suspek.