MANILA, Philippines - Patay ang isang driver makaraang pagbabarilin ng hindi kilalang salarin sa barangay Commonwealth, Quezon City kahapon ng alas 4:30 ng madaling-araw.
Kinilala ang biktima na si Valentino Torres, 43, part time driver ng Ericson St. Doña Nicasia Subd., Brgy. Commonwealth sa lungsod.
Ayon kay PO3 Hermogenes Capili ng QC Police District Criminal Investigation and Detection Unit (QCPD-CIDU) naganap ang insidente sa Payatas Road, Ipil Ipil St.,Payatas B. Si Torres ay nasawi dahil sa tinamong apat na tama ng bala ng baril sa kanyang katawan.
Sinasabing pinakiusapan si Torres para ipagmaneho ang isang Evelyn Lisardo kung kayat nagtungo ang una sa bahay ng huli sa nabanggit na lugar.
Habang binubuksan na ng biktima ang gate ng bahay ni Lisardo ay doon na sunud -sunod na pinagbabaril ang una ng hindi kilalang salarin na agad nitong ikinasawi .
Blangko pa ang pulisya sa motibo sa krimen, habang patuloy namang iniimbestigahan ang insidente.