MANILA, Philippines - Matagumpay na nakapagnakaw ang sinasabing miyembro ng ‘Gapos Gang’ makaraang pasukin ang isang bahay at igapos ang ginang, kamakalawa ng gabi sa Navotas City.
Nakilala ang biktima na si Graceteli Abocejo, 31-anyos, ng North Bay Boulevard South, ng naturang lungsod.
Sa salaysay ni Abocejo sa pulisya, dakong alas-9:45 ng gabi, hindi siya makatulog dahil sa hindi pa umuuwi ang kanyang mister. Nakaramdam siya ng kaluskos sa sala ng kanilang bahay kaya inakala niyang ang kanyang asawa na ito.
Lumabas pa ng sala ang ginang at tinawag ang pangalan ng kanyang mister. Dito na siya tinutukan ng baril ng isa sa mga suspect, iginapos at binusalan ang bibig. Mabilis na naghalughog naman ang mga magnanakaw at natangay ang isang mamahaling cellular phone at alahas na nagkakahalaga ng P7,000.
Masuwerte namang hindi ginalaw ng mga magnanakaw ang ginang at mabilis na tumakas. Nagawang makalag ni Abocejo ang gapos at humingi ng saklolo sa pulisya ngunit hindi na inabutan pa ang mga suspect.