MANILA, Philippines - Napatay ang 31-anyos na tricycle driver na sinasabing lango sa alak na nagmaneho habang kritikal naman ang kasamahan nito makaraang pagtulungang bugbugin at saksakin ng mga tambay kahapon ng madaling araw sa Caloocan City.
Naisugod pa sa Caloocan Medical Center subalit namatay din ang biktimang si Marlon Lorella ng Phase 3 F1 Dagat-Dagatan. Habang malubha naman sa saksak ang kasamahan nito na si Rodel Subron, 32.
Pinaghahanap naman ng pulisya ang pangunahing suspek na si Jessie Manuel ng Barangay 14 sa nasabing lungsod.
Lumilitaw na muntik nang masagi ng traysikel ni Lorella kasama si Subron ang suspek pagsapit sa panulukan ng Langaray Street at Dagat-Dagatan Avenue bandang ala-1:30 ng madaling-araw.
Gayon pa man, nauwi sa mainitang pagtatalo hanggang sa maglapitan ang tropa ni Manuel bago pinagtulungan bugbugin ang dalawang senglot at pagsasaksakin. Agad na tumakas si Manuel at mga kasama matapos ang pananaksak.