Killer ng lover ni misis, arestado

MANILA, Philippines - Nagwakas ang walong taong pagtatago sa batas ng 52-anyos na dating overseas Filipino worker (OFW) na sinasabing pumatay sa kalaguyo ng kanyang misis matapos itong masakote ng mga operatiba ng pulisya ka­makalawa ng hapon sa bahay ng kanyang pamangkin sa Leyte Street, Balic-Balic, Sampaloc, Maynila.

Sa bisa ng warrant of arrest sa kasong murder na inisyu ni Judge Danilo Ma­nalastas ng Malolos Regional Trial Court Branch 7, Bulacan, nasakote ng mga tauhan ng Manila Police District at Bulacan PNP ang suspek na si Alejandro B. Panopio ng Area-C, Barangay San Martin 1, San Jose Del Monte City, Bulacan.

Base sa record ng korte, si Panopio na OFW sa Africa ay napilitang umuwi matapos mabalitaang nakikipag­relasyon ang kanyang misis sa ibang lalaki na may mga anak din.

Nag-ipon pa ng mga ebi­densiya ang suspek kung saan sinubukang ilapit sa kontrobersyal na magkaka­patid ang kanyang problema kaugnay sa panga­nga­liwa ng misis subalit hindi naaksyunan dahil sa matin­ding problemang kinakaharap ng magkakapatid na lalaki noong 2006.

Gayon pa man, sinubaybayan ng suspek ang  kanyang misis hanggang sa ma­­aktuhang magkaakbay ang magkalaguyo kaya nagawang  saksakin niya ito at mapatay.

Hindi na nakapalag ang suspek matapos makorner ng pangkat nina P/Insp. Michael Ray Bernardo at P/Insp. Edward Samonte.