MANILA, Philippines - Patay ang isang motorÂcycle rider makaraang barilin ng isang hindi pa nakikilalang motorista na lulan naman ng isa pang motor na naka-karerahan nito sa Pasay City kahapon ng madaling-araw.
Nakilala ang biktima sa kanyang driver’s license na si Dewy Ontog, 30, ng Block.11, Lot 23, Barangay Upper Bicutan, Taguig City. Nagtamo ito ng mga tama ng bala buhat sa isang kalibre .40 mm pistol sa iba’t ibang parte ng katawan.
Sa ngayon ay patuloy na inaalam ng Pasay City Police ang pagkakakilanlan ng suspek.
Base sa imbestigasyon ng pulisya, dakong 3:35 ng madaling-araw nang mangyari ang insidente sa Macapagal Ave., Roxas Boulevard sa lungsod ng Pasay. Sakay umano ng kanyang asul na motorsiklo (2656-HZ) ang biktima nang mag-overtake sa isang motorsiklo na kinalululanan ng suspek.
Hinabol naman ito ng salarin at nang magdikit ang kanilang mga motor ay sunud-sunod nang pinaputukan ang biktima at mabilis na tumakas.
Narekober sa crime scene ang 19 na pirasong fired cartridge sa pinangyarihan sa lugar.