MANILA, Philippines - Isang rider ang nasawi matapos itong tumilapon at tumama sa gutter ang ulo nito nang sumemplang ang minamaneho makaraang takbuhan umano ang mga pulis na nagsasagawa ng checkpoint sa Valenzuela City kahapon ng madaling araw.
Dead-on-the-spot ang biktimang si Rolando Nillo, 52, ng Bagong Barrio, Caloocan City.
Ayon sa report ni Inspector Leo Glen CaÂlabio, ng Valenzuela City Police, alas-2:00 ng madaling araw habang nagsasagawa sila ng checkpoint sa kahabaan ng Gen. T. De Leon ng nasabing lungsod nang mamataan ang nasawi lulan ng motorsiklo na ‘for registration’ at walang suot na helmet. Pinara ang biktima ng mga pulis, subalit sa halip na huminto ay lalo pang pinaharurot nito ang minamanehong motorsiklo na naging dahilan upang habulin ito ng nakamotorsiklo ding mga pulis.
Pagsapit sa palikong bahagi ng Mc Arthur Highway, Brgy. Malinta ng nasabing lungsod ay nawalan ng kontrol ang biktima at nagpagewang-gewang ang motorsiklo hanggang sa sememplang ito.
Sa lakas ng impact, tumilapon ang biktima bago tumama ang ulo nito sa gutter na naÂging dahilan ng kanyang agarang kamatayan.
Bukod sa walang helmet, wala din dalang mga papeles ang biktima sa minamanehong bagong motorsiklo.