Obrero pinatay dahil sa paputok

MANILA, Philippines - Tumambad ang bangkay ng 26-anyos na obrero na sinaksak ng kanyang kapitbahay na sinasabing nagalit dahil sa paputok matapos ang putukan sa pagsalubong sa Bagong Taon sa Pasig City kahapon ng madaling araw.

Nagtamo ng saksak sa dibdib at sikmura ang biktimang si Christian Develleres, binata, ng Purok 6 Callejon II, Brgy. Sta. Cruz sa nasabing lungsod.

Samantala, hinahanting naman ngayon ng pulisya ang tumakas na suspek na si Gene Garcia.

Sa ulat ng Pasig PNP, matapos ang kasagsagan ng putukan, dakong ala una y medya ng madaling-araw nang makitang nagtatalo sina Develleres at Garcia sa hindi pa mabatid na dahilan.

Nagbunot ng patalim ang suspek at dalawang beses na inundayan ang biktima bago mabilis na tumakas. 

Sinaklolohan naman ng mga kaanak si Develleres at isinugod sa Pasig City General Hospital ngunit hindi na umabot ng buhay.