Binata sugatan sa ligaw na bala

MANILA, Philippines -  Sugatan ang isang 19-anyos na binata nang tamaan  ng ligaw na bala habang natutulog sa loob ng bahay  sa Sampaloc, Maynila, kahapon ng madaling-araw. Ginagamot na sa National  Orthopedic Hospital ang biktimang si Francisco Salazar,  ng Calabash St., Sampaloc, Maynila sanhi ng tama ng bala sa kaliwang paa. Sa ulat ng Manila Police District-Station 4, dakong alas-2:30 ng madaling-araw nang makaramdam ng kirot sa kaniyang paa ang biktima kaya nagising ito. Nang bumangon at buksan ang ilaw ay nakitang umaagos ang dugo sa kaniyang paa. Isinugod siya ng kapamilya sa nasa­bing pa­gamutan. Iniimbestigahan kung saan nagmula ang putok at kung sino ang responsable sa nasabing stray bullet na tumama sa biktima.