MANILA, Philippines - Tagos sa mata ang tama ng isang motorcycle rider nang barilin ng kalibre .45 sa ulo ng di kilalang salarin habang binabagtas ang panulukan ng Bulacan at M. Hizon Sts., sa Sta Cruz, Maynila kamakalawa ng hapon.
Kinilala ni SPO2 Ronald Gallo ng Manila Police District-Homicide Section ang biktimang si Charlie Flores, may-asawa, walang trabaho, residente ng no. 2553 Felix Huertas St., Sta Cruz, Maynila sanhi ng tinamong bala.
Hindi pa tukoy ang pagkilanlan ng gunman bagamat isinalarawan na balingkinitan ang pangangatawan, nasa edad 25 hanggang 30.
Dakong alas 5:45 ng hapon nang maganap ang insidente sa kanto ng Bulacan at M. Hizon Sts., Sta Cruz, Maynila.
Minamaneho ng biktima ang kanyang motorsiklo (9264-TI) at binabagtas ang nasabing lugar nang sumulpot ang suspect at walang sabi-sabing inasinta sa ulo ang biktima na ikinabagsak nito at kanyang motorsiklo.
Matapos ang pamamaril ay kaswal na tumakas ang suspect sa direksiyon ng Bulacan St. patungong Rizal Avenue dala ang ginamit na kalibre 45.
Inaalam pa ng pulisya kung ano ang motibo sa pamamaril.