MANILA, Philippines - Patay ang isang menor-de-edad na namumulot ng basura nang paluin at barilin sa ulo, sa Tondo, Maynila, kahapon ng madaling-araw.
Hindi na umabot pang buhay sa Gat Andres Bonifacio Hospital ang biktimang si Arjay Javier Reyes, ng Bldg. 32, Unit 35 Aroma Temporary Housing Unit, Tondo, Maynila, sanhi ng tama ng bala sa ulo.
Inginusong suspect ang isang alyas “Michaelâ€, na inilarawang nasa 30-35 ang edad, may taas na 5’3’’ hanggang 5’4’’, katamtaman ang pangangatawan, nakasuot ng kulay itim na jacket at itim na pantalon na tumakas matapos ang pamamaril.
Sa report, dakong ala-1:30 ng madaling-araw nang maganap ang pamamaril sa harapan ng Bldg. 12, Road 10, Vitas, Tondo, Maynila.
Nauna rito, masayang nagkukuwentuhan ang biktima at kanyang nakababatang kapatid na si John Eric, 16, kasama sa pamumulot ng basura, at iba pang kaibigan nang biglang lapitan ng suspect at pinalo ng baril sa ulo saka tuluyang pinaputukan sa ulo.
Nang bumagsak ang biktima ay tumakbo ang suspect patungo sa isang eskinita na sakop ng Brgy 106, Zone 8. Wala umanong kaaway ang biktima, ayon sa kapatid kaya blangko pa kung ano ang motibo sa pagpatay.